Sa më shumë fliter për të ardhmen e Lionel Messit, aq më shumë mësohet për të shkuarën e tij.

Në rrjetet sociale kanë vërshuar me shumicë videot e lojtarit argjentinas në hapat e parë me Barcelonën, por vetëm së fundmi ka dalë një filmim i Lionel Messit 12-vjeçar para se të kapërcente oqeanin dhe t’i bashkohej Barcelonës.

Ishte koha kur Messi luante për ekipet zinxhir të Newell’s Old Boys në Argjentinë dhe kur tapeti i fushës nuk ishte ideali. Megjithatë, balta e fushës nuk e mbulon dot talentin e lindur të “Pleshtit”, që në ato kohë binte në sy mes moshatarëve për teknikën dhe vizionin e lojës...dhe jo më kot tifozët e skuadrës argjentinase dolën në protestë për të kërkuar rikthimin e tij në shtëpi kur morën vesh se mund të largohej nga Barcelona.

Partia Demokratike vijon me denoncimin e rasteve të banorëve të prekur nga tërmeti, që sipas saj, për shkak të keqmenaxhimit dhe keqqeverisjes prej muajsh jetojnë nëpër çadra.

Rasti i fundit i sjellë nga opozita është ai një qytetari nga Kurbini, që denoncon se fëmija i vogël i ka lindur në çadër.

“Unë jam Eduart Hysa, banor i Shpërdhetit. Deri para një jave kam ndenjur në çadër dhe tani po jetoj në shtëpi të shembur. Jam vetë i gjashti, nëntë muaj në çadër”, thotë kryefamiljari i familjes në denoncimin e publikuar nga PD.

Eduarti thotë më tej se mori përsipër rrezikun dhe u rikthye në banesën e krisur keqazi dhe të vlerësuar si në rrezik shembjeje nga grupet e inspektimit për shkak se nuk mund të rrinte më me fëmijët në çadër, më i vogli prej të cilëve vetëm 6 muajsh.

Ai thotë se nuk ka marrë asnjë ndihmë financiare apo formë tjetër mbështetjeje nga shtetit dhe se është invalid me të ardhura prej 10 mijë lekësh në muaj që nuk i mjaftojnë.

Pas mjekëve, Qeveria premton rritje pagash edhe për mësuesit. Synimi u bë me dije këtë të hënë nga vetë Kryeministri Edi Rama në një takim me mësues që gjatë pandemisë dhanë mësim përmes kanalit “RTSH Shkolla” të televizionit publik.

“Do të bëjmë çmos që ta rrisim mbështetjen për mësuesit, edhe pse kushtet nuk janë optimale për të menduar për këtë, por ne mendojmë që për mjekët dhe mësuesit duhet të bëjmë një sforco të madhe”, tha Rama.

Kryeministri tha se Qeveria do të dalë shumë shpejt me një propozim konkret për këtë. Por, ndryshe nga rasti i mjekëve ku foli për një rritje “domethënëse” të pagave mbi 7 për qind, për mësuesit nuk dha asnjë shifër.

Megjithatë, kreu i Qeverisë tha se rritja do të kalojë së bashku me buxhetin e ardhshëm dhe përveçse do të jetë e përgjithshme, pra për të gjithë mësuesit, do të shqyrtohet edhe mundësia e vlerësimit të mësuesve mbi një sistem meritokracie.

"Po mendojmë për një sistem të vlerësimit të mësuesve që po e analizojmë dhe nga viti i ardhshëm shkollor do të jeë gati ku mësuesit më të mirë do të duhet të vlerësohen financiarisht ndryshe”, u shpreh ai.

Kryeministri Edi Rama u përplas me Dora Bakojanisin, ish-ministren e Jashtme greke gjatë diskutimit në forumin ekonomik të organizuar në Athinë nga “The Economist”.

Debati mes Ramës dhe Bakojanisit, që është njëkohësisht edhe e motra e Kryeministrit aktual grek, Kyriakos Mitsotakis u zhvillua rreth vendimit të Gjykatës Kushtetuese shqiptare që rrëzoi marrëveshjen e detit të arritur në 2009, ku si ish-kryediplomate e Greqisë, Dora Bakojanis është firmëtare e saj.

Pasi shprehu “keqardhjen” për vendimin e Gjykatës Kushtetuese shqiptare, Bakojanis nënkuptoi se pas këtij vendimi qëndronte Turqia dhe ndërhyrja e saj.

“Ndjeva keqardhje për vendimit e gjykatës në shqipëri për marrëveshjen e detit. Mendoj që ndërhyrja e vendeve të treta në këtë çështje nuk ndihmon. Ne e dimë që Turqia ka qenë shumë kundër kësaj marrëveshjeje”, deklaroi ajo.

Rama e kundërshtoi duke thënë se në kohën e vendimit të Gjykatës Kushtetuese ai nuk ka pasur asnjë takim me Erdogan dhe se edhe pas këtij momenti, Turqia nuk ka shfaqur asnjëherë interes për këtë çështje.

“Gjykata Kushtetuese mori vendim për këtë marrëveshje në 2009 dhe në atë kohë, as e kisha takuar dhe as kisha folur me Erdogan, asokohe Kryeministër i Turqisë. Nuk kishim asnjë raport. Ne vendosëm që marrëveshjen ta çonim në gjykatë për një arsye të thjeshtë, kishte një debat të madh në shoqëri, që u nis nga shoqëria civile dhe nuk doja që ky debat të shndërrohej në politik dhe në luftën e zakonshme mes opozitës dhe pozitës dhe ne e çuam në gjykatë. Është e pavërtetë ndërhyrja nga Turqia. Asnjëherë në asnjë takim me Presidentin Erdogan nuk kam dëgjuar prej tij që kjo marrëveshje është e ndonjë interesi për Turqinë. Na duhet të qartësojmë, sepse këto ide ndikojnë tek qëndrimet tona ndaj njëri-tjetrit”, u shpreh Rama.

Shqipëria ka partneritet strategjik si me Turqinë, ashtu edhe me Greqinë. Por, Rama thotë se kjo nuk e vendos Tiranën në mes të dy zjarreve. Kryeministri shqiptar, që të hënën u takua me Erdogan në Turqi, tërthorazi përcolli në Athinë “porosinë” e Presidentit turk për dialog.

“Ajo që mund të them pa asnjë dyshim është që Presidenti turk nuk është një politikan antigrek. E shkuara ka treguar se kur ka vullnet ka një rrugëzgjidhje. Duhet një dialog i mirëfilltë. Nuk është e thjeshtë, por jo e pamundur. Jam i bindur se marrëdhëniet konstruktive turko-greke mund të jenë me vlerë të shtuar për të gjithë Europën. Greqia është në pozicionin e duhur për të qenë ndërmjetësi i ndershëm për këtë”, u shpreh Rama.

Ndërkohë, duke iu rikthyer çështjes së detit mes Shqipërisë dhe Greqisë, Rama konfirmoi qëndrimin zyrtar të palës shqiptare që ja njeh të drejtën greke për t’u zgjeruar me 12 milje, por për të zgjidhur mosmarrëveshjen sugjeroi që dy vendet t’i drejtohen një vendi të tretë mik, ose gjykatave ndërkombëtare.

“Ne mund ta zgjidhim çështjen me ndihmën e të tjerëve. Nëpërmjet palëve të treta që na ndihmojnë miqësisht, apo edhe gjykatës ndërkombëtare. Do të jetë e drejtë objektive dhe nuk mund të përdoret nga patriotët këtu dhe në Shqipëri”, u shpreh ai.

“BE, rruga e vetme për ne“

Kryeministri Edi Rama është i bindur se rajoni i Ballkanit Perëndimor nuk ka asnjë alternativë tjetër përveçse anëtarësimit në Bashkimin Europian dhe këtë e theksoi edhe gjatë fjalës që mbajti në forumin ekonomik të organizuar në Greqi nga revista “The Economist”.

“Alternativa e vetme është Bashkimi Europian, jo sepse na e kërkojnë miqtë më të mëdhenj e të fuqishëm, por sepse kjo është një kërkesë e fëmijëve tanë, e brezit të ardhshëm, është ëndrra e përhershme e etërve tanë”, shton ai.

Rama vlerësoi si pozitive aftësinë e udhëheqësve të rajonit për t’u ulur dhe biseduar me njëri-tjetrin për çështje të ndryshme, pavarësisht se në mes qëndrojnë ende ndasi të thella, si në rastin e Kosovës me Serbinë.

Si shembull të bashkëpunimit dhe zgjidhjeve që mund të prodhohen përmes dialogut, Rama solli marrëveshjen e emrit mes Greqisë dhe Maqedonisë së Veriut.

“Për ta përmbyllur, mund të përmend një nga shembujt më të jashtëzakonshëm të kësaj kohe, që është zgjidhja dialogu mes Greqisë dhe Maqedonisë së Veriut. Është një mësim për të gjithë”, tha ai.

Kryeministri vlerësoi rolin e Zoran Zaev, që sipas Ramës theu tabutë dhe i fitoi sërish zgjedhjet, pavarësisht se mund të kishte krijuar shumë pakënaqësi në vendin e tij me marrëveshjen e arritur me Greqinë.

Presidenti Ilir Meta tha se çdo përpjekje për të devijuar nga marrëveshja e 5 qershorit mes mazhorancës dhe opozitës do të konsiderohet prej tij si tentativë për grusht shtetit, që do të marrë përgjigjen e grushtit të popullit.

“Ftoj aktorët politikë t’i qëndrojnë marrëveshjes së 5 qershorit, të mos devijojnë asnjë milimetër nga ajo marrëveshje, të mos përdorin gjasmë hapjen e listave për të prishur atë marrëveshje. Përshëndes qëndrimin e opozitës për të hapur 100 për qind listat. Nëse mazhoranca nuk dëshiron që të hapë listat për vete, le t’i mbajë të mbyllura, por nuk ka përse të pengojë partitë e tjera. Nëse ka shkelje të njëanshme të asaj marrëveshjeje, siç u bë me ndryshimet kushtetuese kemi tentativë për grusht shteti dhe kuptohet që grushti i shtetit do të shtypet nga grushti i popullit”, u shpreh Meta.

Presidenti iu rikthye kërcënimeve për shpërndarjen e Parlamentit, ku u pyet në lidhje me nismën e mazhorancës për të rregulluar me ligj kompetencat e tij.

“Nuk ka ligj antikushtetues nga një Parlament jokushtetues që e pengon Presidentin të përmbushë misionin kryesor në mbrojtje të Kushtetutës dhe të zgjedhjeve të lira dhe të ndershme. Mazhoranca e ka provuar me Presidentin. 3 me 0 në Venecia, pavarësisht nga lobimet dhe miliardat që ka shpenzuar lartë e poshtë. Ky është Presidenti i 2 marsit. Populli i 2 marsit është po aty dhe është shtuar madje dhe kërkojnë shpërndarjen. Unë them që të shkojmë më 25 prill. Nëse këta duan shpërndarjen, le ta provojnë. Le ta provojnë se kush shkarkon njëri-tjetrin. Presidenti ka respektuar dhe do të respektojë Kushtetutën”, tha ai.

Presidenti u është rikthyer daljeve të përjavshme para gazetarëve, pas rindezjes së përplasjeve me mazhorancën për një sërë çështjesh. Meta gjjatë javës iurikthye gjithashtu edhe toneve të ashpra ndaj Parlamentit, që e quajti “njëpartiak” kur i kërkoi tërheqjen nga miratimi i paketës antishpifje.

Presidenti i dërgoi gjithashtu Kuvendit një shkresë për procesin e plotësimit të Gjykatës Kushtetuese dhe Gjykatës së Lartë. Ai tha se zvarritja e këtij procesi është e pajustifikueshme dhe akuzon KED dhe KLGj për përzgjedhje selektive të kandidatëve për gjyqtarë në Kushtetuese dhe Gjykatën e Lartë.

Lulzim Basha paralajmëroi se sistemi shëndetësor i vendit po shkon drejt kolapsit për shkak të mungesës së menaxhimit të pandemisë nga ana e strukturave shtetërore.

Basha renditi një sërë problematikash, që nga mungesa e hetimit epidemiologjik, mungesa e pajisjeve në spitale, përqëndrimi i personave të infektuar vetëm në Tiranë, mungesa e subvencionimit të ilaçeve që përdoren nga personat e infektuar, kurimi me telefon i pacientëve, mungesën e pajisjeve mbrojtëse për mjekët dhe deri tek rënia e personelit mjekësor në krahasim me periudhën e fillimit të pandemisë.

“Situata paraqitet në prag të katastrofës. Jemi në garë me kohën dhe është e pafalshme që 6 muaj pas nisjes së pandemisë, askush nuk ka një informacion dhe siguri se çfarë masash janë marrë dhe çfarë mësimesh janë nxjerrë deri më tani”, tha ai.

Kreu i PD-së u takua me ekspertë të shëndetësisë dhe mjekë këtë të mërkurë, nga ku tha se Qeveria ka lënë në harresë mjekët dhe akuzoi se mungon një strategji për t’u përballur me përkeqësimin e mundshëm të situatës me rihapjen e shkollave.

Ai tha se brenda javës opozita do të dalë me një platformë konkrete për të përballuar krizën, duke lënë menjëanë luftën politike.

“Brenda javës do të dalim me një propozim konkret, të mos shpërqëndrohemi nga fakti që propozimi ynë i parë nuk u dëgjua. na duhet një propozim konkret sepse tani nuk bëhet fjalë për politikë, por për jetën dhe larg qoftë vdekjen e qytetarëve. ta themi fort fjalën tonë se çfarë duhet të bëjmë urgjentisht dhe çfarë duhet të ndalojmë urgjentisht”, u shpreh Basha.

Presidenti Ilir Meta është radhitur në krah të ambientalistëve, duke dalë hapur kundër projekteve për ndërtimin e dy hidrocentraleve në Lumin e Vjosës, atij të Poçemit dhe të Kalivaçit.

Meta tha se dy hidrocentralet do të shkatërrojnë vlerat e lumit të fundit të egër në Europë dhe i kërkoi Qeverisë që të shqyrtojë burime të tjera energjitike dhe më miqësore me mjedisin, si ajo diellore, apo me erë.

“Unë mbështes ndalimin e digave mbi Vjosë dhe shpalljen park kombëtar të zonave ku janë përcaktuar të ndërtohet i HEC-et e Poçemit dhe Kalivaçit”, tha Meta.

Presidenti mori pjesë në një tryezë të rrumbullakët me studiues shqiptarë dhe të huaj me temë “E ardhmja e Vjosës”.

Meta thotë se që prej 2007 e në vazhdim qeveritë shqiptare kanë dhënë në mënyrë të nxituar lejet për ndërtimin e hidrocentraleve, duke deklaruar se rreth 80 prej tyre janë në zona të mbrojtura, ose me perspektivë për t’u shpallur si të tilla.

“Prej 2007 është rritur jashtëzakonisht shumë numri i përgjithshëm i HEC-eve. Dendësia e HEC-eve është më e larta në ballkan, gati dyfish më e lartë në krahasim me vendet e rajonit. Mbi 80 HEC-e janë dhënë në zona të mbrojtura, ose zona me perspektivë për t’u klasifikuar si zona të mbrojtura. Ky duhet të jetë një shqetësim”, u shpreh Meta.

Presidenti foli i shqetësuar për heshtjen dhe këmbënguljen e Qeverisë për të vijuar me projektin e digave në Vjosë dhe akuzoi qeverinë se këto projekte përgatiten në mënyrë të nxituar dhe të papërgjegjshme.

“Asnjëherë nuk ka ndodhur që një raport i ndikimit në mjedis të rrëzojë një projekt për HEC. Ekspertët sugjerojnë burimet alternative të energjisë, si energjia diellore, që është më i qëndrueshëm dhe më ekologjik”, u shpreh Meta.

Sipas të dhënave të Ministrisë së Infrastrukturës dhe Energjisë, pjesa më e madhe e lejeve të dhëna për ndërtim hidrocentralesh është bërë nga viti 2009 deri në vitin 2013 me 145 kontrata koncesionare dhe 386 HEC-e. Nga 2013 deri në 2018 janë dhënë 49 kontrata koncesionare dhe 100 leje ndërtimi HEC-esh.

Në Tepelenë është ngritur qendra kërkimore ndërkombëtare “Vjosa Research Center Fritz Schiemer”, që synon të ndërgjegjësojë dhe promovojë ruajtjen e atij që konsiderohet lumi i fundit i egër i Europës.

Qendra do të mbajë emrin e profesorit austriak, Fritz Schiemer për ndër të kontributit të dhënë prej tij për promovimin dhe ruajtjen e vlerave të rralla natyrore të këtij lumi.

Në ceremoninë e hapjes së kësaj qendre morën pjesë Presidenti Ilir Meta, vetë profesori austriak, Fritz Schiemer, kryetari i Bashkisë së Tepelenës, Tërmet Peçi, studiues, ambientalistë dhe aktivistë që janë rreshtuar kundër ndërtimit të HEC-eve në këtë lum.

Qëndra do të shërbejë edhe për studentët shqiptarë dhe të huaj si laborator studimi dhe është e pajisur edhe me dhoma fjetjeje.

Aktualisht, gazeta “Si” mëson se ka disa projekte ndërkombëtare, kryesisht austriake dhe nga universitete dhe qëndra kërkimore të huaja, por që kanë mbetur pezull për shkak të pandemisë së koronavirusit.

Kryebashkiaku i Tepelenës, Tërmet Peci kërkoi mbrojtjen e Vjosës gjatë përurimit të Qendrës Kërkimore Ndërkombëtare "Vjosa Research Center".

Kryeministri Edi Rama tha se nuk ishte në dijeni të propozimit të opozitës së bashkuar në lidhje me hapjen e listave dhe formulën e koalicioneve. Ai nënkuptoi se drafti do të shqyrtohet në Këshillin Politik dhe në komisionet parlamentare.

“Është në tagrin e grupit që merret me reformën zgjedhore që të trajtojë këtë çështje”, tha Rama.

Kryeministri u shpreh se ishte i pakënaqur me punën e drejtuesve politikë të socialistëve në qarqe.

“Nuk jam asnjëherë i kënaqur, as me veten time, lëre më me punën e drejtuesve politikë. Ne jemi në punë të përditshme dhe është koha për të intensifikuar komunikimin me njerëzit dhe punën që të vazhdojmë të përmirësojmë marrëdhëniet mes institucioneve të pushtit qendror dhe lokal në bazë me qytetarët”, vijoi ai.

Këto deklarata, Rama i bëri pas takimit javor me shtabin elektoral për zgjedhjet 2021.

Komisioni i Ligjeve u mblodh për të diskutuar draftet dhe amendamentet e propozuara nga mazhoranca dhe opozita parlamentare për ndryshimet në Kodin Zgjedhor.

Rudina Hajdari kërkoi që mbledhja të shtyhet.

“Duhet ta shtyjmë këtë, sepse duhet të rakordohemi me opozitën jashtëparlamentare, kemi nesër një takim në këshillin politik dhe do të ishte e udhës të zhvillojmë atë takim dhe pas shqyrtimit të propozimit të opozitës jashtëparlamentare të bëjmë një takim tjetër. propozimi i opozites jashtëparlamentare preg shume nene të propozimeve sot”, u shpreh ajo.

Damian Gjiknuri e hodhi poshtë, duke thënë se Komisioni të vazhdojë punën me shqyrtimin e propozimeve të opozitës parlamentare dhe të mazhorancës, ndërsa për propozimin e PD-së ai të diskutohet në Këshill. Gjiknuri tha se halli i PD-së janë koalicionet.

Por, Myslim Murrizi u shpreh se veç koalicioneve, drafti i PD-së propozon edhe hapjen e plotë të listave.

Kjo është mbledhja e dytë e Komisionit me këtë temë. Kreu i Komisionit të Ligjeve tha se është bërë një draft i integruar mes propozimit të opozitës parlamentare dhe propozimit të Partisë Socialiste.

Manja kërkoi që opozita të tërhiqet nga ato nene që nuk kanë lidhje me ndryshimet kushtetuese të 30 korrikut, mes të cilave është edhe propozimi për të kaluar në një sistem proporcional kombëtar.

Ky propozim është i Nismës Thurje, që në Kuvend është depozituar nga deputeti Ralf Gjoni.

Mbledhja e Komisionit të Ligjeve, ku në rend të ditës ishte diskutimi dhe shqyrtimi i propozimeve të opozitës parlamentare për ndryshimet në Kodin Zgjedhor dështoi për shkak se vetë opozita parlamentare e bojkotoi këtë mbledhje.

Shkak i bojkotit është bërë përplasja në lidhje me draftin e propozuar nga Partia Demokratike për hapjen e listave dhe koalicionet. Opozita parlamentare u shfaq e joshur nga pjesa e hapjes 100 për qind të listave, propozuar në draftin e PD-së dhe LSI-së dhe i dorëzuar në Këshillin Politik.

Myslim Murrizi, Rudina Hajdari dhe Ralf Gjoni kërkuan që mbledhja të shtyhej dhe të zhvillohej pas diskutimeve në Këshillin Politik, që pritet të mblidhet ditën e enjte.

“Duhet ta shtyjmë këtë, sepse duhet të rakordohemi me opozitën jashtëparlamentare, kemi nesër një takim në Këshillin Politik dhe do të ishte e udhës të zhvillojmë atë takim dhe pas shqyrtimit të propozimit të opozitës jashtëparlamentare të bëjmë një takim tjetër. propozimi i opozites jashtëparlamentare preg shume nene të propozimeve sot”, deklaroi Hajdari.

Por, Damian Gjiknuri tha se rendi i ditës në Komisionin e Ligjeve nuk diktohej nga agjenda e Këshillit Politik dhe kërkoi që puna për shqyrtimin e propozimeve të opozitës parlamentare të vazhdojë. Rudina Hajdari e kundërshtoi duke thënë se disa pika të propozimeve të PD-LSI bien ndesh me disa pika të propozuara nga opozita parlamentare.

Ndërkohë, Myslim Murrizi dhe Halit Valteri u tërhoqën nga një nismë e propozuar në janar të këtij viti për ndryshimin e Kodit Zgjedhor, që kërkon ndryshim të sistemit duke kaluar në proporcional kombëtar. Murrizi argumentoi se vendimi për t’u tërhequr mbërrin pas ndryshimeve kushtetuese të 30 korrikut, që e bëjnë të pamundur miratimin e këtyre propozimeve.

Ai që nuk u tërhoq nga propozimi për ndryshimin e sistemit zgjedhor ishte Ralf Gjoni, që ka depozituar në Kuvend draftin e Nismës Thurje, për hapjen e listave dhe ndryshimin e sistemit zgjedhor.

Pavarësisht kësaj ndasie, pas largimit nga mbledhja e Komisionit të Ligjeve, deputetët e opozitës parlamentare u shfaqën të bashkuar dhe mirëpritën që në Komision të diskutohej drafti i Partisë Demokratike.

“Edhe nga Bashkimi Sovjetik të mbërrijë një draft që hap listat, unë do ta mbështes”, deklaroi deputetit Myslim Murrizi, kur u pyet nëse e mbështet propozimin e Partisë Demokratike.

Sindi Breshani sjell diktaturën përmes lojërave virtuale

Sindi Breshani sjell diktaturen permes lojerave virtuale

Partia Socialiste nuk do të rezervojë asnjë surprizë dhe ashtu sikundër ka paralajmëruar synon që të votojë në seancën parlamentare të së hënës draftin me ndryshimet në Kodin Zgjedhor, që kaloi ditën e premte në Komisionin e Ligjeve me kundërshtimin e opozitës parlamentare.

Kryeministri Edi Rama tha se PS lëshoi mjaftueshëm duke kënaqur të dyja opozitat. Ai thotë se për hir të kërkesave të opozitës, mazhoranca vetë nuk ka marrë asgjë ashtu siç e ka dashur vetë.

“Në këtë proces ne kemi qenë shërbëtor të përulur të të tjerëve. Këtë e them me plot gojën, kemi bërë atë që nuk e ka bërë kurrë asnjë parti. Përveç opozitës brenda Kuvendit kemi shërbyer edhe për një opozitë jashtë saj. Të gjithë kanë marrë shumë më shumë se sa ne nga ky proces në sensin e asaj, që kanë dashur. Ne nuk kemi marrë atë që kemi dashur nga ky proces. Ka aty gjëra që janë, sepse kështu i do opozita si jashtë dhe brenda Parlamentit, ndonjë gjë që është aty se kështu e duam ne, aty nuk ka”, deklaroi Rama.

Kryeministri Edi Rama do t’u kërkojë shqiptarëve më 25 prill mandatin e tretë duke u mbështetur tek platforma për nxitjen e punësimit dhe tek projektet infrastrukturore, që mund të ndërtohen falë paketës prej 20 miliard euro për rajonin të Bashkimit Europian.

Për të parën, Rama tha se sot vendi ka mundësi për të ndezur motorë të rinj të ekonomisë falë rritjes së fuqisë së brendshme të tij.

“Pse dhe si do ta bëjmë Shqipërinë të vrapojë në mandatin e tretë pasi ka ecur dhe ka ecur jo pak në këtë mandat, duke rimarrë veten nga lëngimi dhe paraliza ku ne e gjetëm në mandatin e parë? Faktet thonë që ne kemi dy krahë, kemi krahun e fuqisë sonë të brendshme që sot është shumë më e madhe seç ishte dhe përmes këtij krahu kemi sot para syve tanë një sërë motorësh të rinj për t’i ndezur ekonomisë dhe për të nxitur jo thjesht punësimin në numra, por një punësim ku vlera e pagës edhe në sektorin privat do të rritet”, u shpreh ai.

Krahu tjetër është paketa financiare prej 20 ml eurosh e premtuar nga Bashkimi Europian për rajonin në infrastrukturë, energji dhe digjitalizim.

“Kemi krahun tjetër të ri që është shumë i fuqishëm që është plani i ri europian, që bazohet tek ai që ka qenë vizioni që për fatin tim të madh dhe nderin tim të madh ju e keni përqafuar të gjithë, vizioni i shengenit rajonal. Ka qenë ai vizion që ka avancuar me vështirësi vit pas viti dhe që është bërë baza sot e planit masiv europian pas ndryshimit të Komisionit Europian dhe ka qenë edhe këmbëngulja jonë për të këmbëngulur që integrimi europian individualisht mund të marrë kohë dhe rajoni duhet mbështetur. Komisioneri për Zgjerimin erdhi këtu dhe tha për një plan prej 9 mld euro grante për vendet e rajonit dhe 20 mld të tjera kredi të garantuara nga 1 mld në 9 mld”, u shpreh Rama.

Por a është në gjendje Shqipëria që të përthithë fondet e BE-së? Rama foli i bindur që po.

“Na takon ne që të bëjmë projektet dhe t’i kthejmë këto para në investime. Ne e kemi treguar që dimë ta bëjmë këtë. Paratë për bujqësinë ishin aty prej vitesh. U desh vota e 2017 që ne të merrnim kreditimin për agjencinë dhe sot ne jemi vendi i parë në rajon për thithjen e fondeve të BE-së për bujqësinë”, deklaroi Kryeministri.

Në lidhje me projektet infrastrukturore, Rama premtoi ndërtimin e hekurudhës Tiranë-Durrës, ndërtimin e aeroporteve në Vlorë e Sarandë dhe përfundimin e aeroportit të Kukësit. Sa u takon porteve, Kryeministri premtoi ndërtimin e portit të jahteve në Vlorë, portin e ri në Sarandë dhe portin e mallrave në Porto Romano, duke e shndërruar në port vetëm për pasagjerë portin e Durrësit. Po ashtu, ai tha se do të shqyrtohet mundësia bashkë me Qeverinë e Kosovës për portin e Shëngjinit.

Sa u takon projekteve në rrugë, Rama deklaroi se shpejt do të nisë puna për autostradën Milot-Fier dhe do të vazhdohet me Milot-Muriqan, si pjesë e “Korridorit Blu” dhe premtoi mbylljen e punimeve në Rrugën e Kombit.

Gjatë fjalës së mbajtur para Asamblesë Kombëtare të Partisë Socialiste, Kryeministri Edi Rama zbuloi se “njëri prej qëllimeve” të ndryshimit të formulës së koalicioneve parazgjedhore ishte “shpëtimi i Lulzim Bashës”.

Basha vetë nuk ishte shënjestër e drejtpërdrejtë e ironisë së Ramës, por u përfshi në “shënjestrën” e Kryeministrit që ishte Meta, Berisha, Kryemadhi.

“Është hall shumë i madh se shyqyr që u prishëm atë trenin e madh. Këta janë në një situatë sa qesharake dhe aq e rrezikshme. Luli është vetëm pasagjer aty. Po lokomotivën e lëviz Iliri, Saliu është skavamento, që ndot edhe ajrin. Monika është faturino. Luli me kapele që përshëndet me ata që presin në plate dhe u flet për taksat.

Lulin dua ta shpëtoj. Këtë nuk e mohoj.

Luli është bërë si ushtar, duhet ta shpëtojmë. Se imagjinoj dot një demokrat që niset si te piramidat, shkon nisesh ia jep votën Lulit me gjithë këto listat, se votim si ky s’kisha dëgjuar ndonjëherë. Kjo Lulit i vjen nga stresi që ka nga Monika dhe Ilir se nuk i do, do t’i heqë , por nuk di si”, tha Rama.

Patrullat e policisë do të vëzhgojnë me rreptësi hapësirat publike dhe ambientet e tjera ku pas ditës së enjte do të vendoset me detyrim mbajtja e maskave për qytetarët.

Paralajmërimi është dhënë nga Drejtori i Përgjithshëm i Policisë së Shtetit, Ardi Veliu.

“Duke filluar nga dita e enjte, çdo qytetar është i detyruar që të mbajë maskë që në momentin që del nga dera e shtëpisë së tij. Patrullat policore do të monitorojnë ambientet dhe hapësirat publike, ku nga e enjtja është e detyruar mbajtja e maskës”, tha Veliu.

Drejtori i Përgjithshëm i Policisë së Shtetit tha se për të gjitha rastet policia do të zbatojë kuadrin ligjor për masat ndëshkimore ndaj qytetarëve. Në fund, Veliu kërkoi nga qytetarët bashkëpunim me policinë dhe të respektojnë masat anti-Covid.

Vendi ynë është përfshirë nga reshje të dendura shiu që prej ditës së djeshme dhe kjo është shoqëruar me probleme në disa qytete të vendit.

Probleme janë hasur në qytetin e Durrësit ku janë përmbytur disa nga rrugët kryesore, si rruga “Aleksandër Goga”, nga Spitali tek Muzeu i Dëshmorëve, lagjja numër 5, zona tek stadiumi dhe rrethrrotullimi i stacionit të trenit.

⁣Ambasadorja amerikane në Tiranë njohu përpjekjet e autoritetet shqiptare në luftën kundër korrupsionit, por duke folur në konferencën e prezantimit të raportit të GRECO-s për antikorrupsioni, Yuri Kim tha se vendi përballet ende me një mal me probleme.

“Në lidhje me korrupsioni ka një mal me probleme në Shqipëri dhe përpjekjet e bëra pas reformës në drejtësi nuk duhen marrë si deklarata fitoreje”, u shpreh Kim.

Kryediplomatja amerikane tha se SHBA do të vazhdojë të mbështesë Shqipërinë në përpjekjet e saj për të çrrënjosur korrupsionin, por kërkoi nga Qeveria që të tregojë më shumë vullnet për t’u anuar nga ana e qytetarëve. Kim foli përmendi që nga korrupsioni më i rëndomtë në zyrat e shtetit, deri tek format më të ndërlikuara të tij me fryrjen e vlerës së tenderave.

“Një nga mënyrat për të çrrënjosur korrupsionin është të punosh në emër të qytetarëve dhe jo në emër të interesave të ngushta. Qytetarët kanë nevojë që paratë e tyre të investohen për përmirësimin e jetës së tyre. Të gjitha qeveritë vuajnë nga një nivel korrupsioni, por qeveritë mund të dënojnë ata që bëjnë korrupsion. Policia, prokurorët dhe gjyqtarët e pavarur janë thelbësorë për një qeverisje të mirë. Do të ketë gjithmonë aktorë të këqinj, por qeveritë duhet t’i dënojnë duke treguar që qeveria është në krahun e njerëzve”, tha ambasadorja.

Edhe Kryeministri Edi Rama i mëshoi reformës në drejtësi si mekanizmi që do të luftojë korrupsionin. Por, ai e cilësoi të gabuar perceptimin se koka e korrupsionit në Shqipëri janë politikanët.

“Koka e korrupsionit në Shqipëri nuk janë politikanët. Nuk kanë qenë politikanët, pavarësisht se kanë qenë pjesë. Koka ka qenë gjykatësit dhe prokurorët që kanë garantuar pandëshkueshmërinë në këtë sistem. Po të mos kishin qenë këta, nuk do të kishin qenë as korrupsioni spektakolar dhe nganjëherë edhe vrastar i politikanëve. Nëse nuk vendoset në themel të drejtësisë kurbani i korrupsionit 30-vjeçar, që është fiks tek korporata që vettingu po e shpërbën, por nuk mjafton, atëherë ngrehina nuk do të qëndrojë dhe historia do të përsëritet dhe do të përsëritet keq”, tha Rama.