Nisma që “bashkon” Ballkanin përçan shqiptarët
Krijimi i zonës së lirë ekonomike në Ballkanin Perëndimor si përpjekje për të afruar popujt e rajonit po prodhon si efekt anësor përçarjen e shqiptarëve. Në Tiranë, nisma e Ramës me Vuçic dhe Zaev ka hasur në një rezistencë minimale, por në Prishtinë klasa politike është shprehur thuajse njëzëri kundër.
Dukshëm marrë shkas nga qëndrimet dhe reagimet që mbërritën nga Kosova, në fjalën e mbajtur në përfundim të samitit të Ohrit, mesazhi i Kryeministri Edi Rama adresohej për në Prishtinë. Rama qortoi udhëheqësit kosovarë se rruga e vetëpërjashtimit dhe e vetëizolimit nuk sjell dobishmëri. Mes emrave që doli kundër nismës ishte edhe Presidenti i Kosovës, Hashim Thaçi. Rama nuk e përmendi në emër, por mes rreshtave e akuzoi për qëndrime të dyfishta.
