Gjobë kush nuk vetëizolohet, Rama: E parashikon ligji

Pjesë e masave mbrojtëse është edhe vetëizolimi i personave që hyjnë në Shqipëri nga rajonet që njihen si zona të kuqe me shpërthime të mëdha të epidemisë. Kryeministri Edi Rama tha se kjo masë është e parashikuar edhe në kuadrin ligjor të vendit dhe paralajmëroi ndëshkimet me gjobë për këdo që shkel masën e vetëizolimit.

“Vetëkarantinimi është një element që gjendet edhe në ligjin aktual dhe shoqërohet me masë administrative për këdo që thyen këtë rregull. Për të ruajtur veten dhe të tjerët duhet të vetëkarantinohet nëse vjen nga një zonë e kuqe”, deklaroi ai.

Kryeministri ftoi mediat për vetëpërmbajtje dhe deklaroi se armiku më i madh në këtë situatë nuk është virusi, por paniku.

“Mediat të vetëpërmbahen dhe të kenë dhe dijen se në këtë situatë armiku më kërcënues nuk është koronavirusi por paniku që stimulohet nga lajme të rreme dhe ekzagjerime të paatorizuara dhe jo shkencore. Nuk është e tepërt të thuhet se duhet të jemi aleatë", u shpreh ai.