Foto / Basha pritet me protesta në Fier, forcat e policisë shmangin përplasjen
Lulzim Basha u prit me protesta nga mbështetësit e Sali Berishës në Fier dhe para se të hynte në teatrin Bylis të qytetit të dyja palët “rivalizuan”; njëri grupim e priti me brohorima, tjetri me “Basha ik”.
Për të shmangur përplasjen mes dy grupimeve, në Fier mbërritën edhe forca nga Policia e Vlorës, ndërsa i pranishëm ishte edhe një grup i Forcave të Ndërhyrjes së Shpejtë.
“Basha në Fier i shoqëruar nga forcat speciale nën mbrojtjen e Edi Ramës! Po nga kush të mbron Rama z. Basha? Nga demokratët, që të kanë mbështetur me vite të tera? Janë po të njëjtët, që kanë qenë para Kryeministrisë. Janë ata, që mbyte me gaz, para shtëpisë tonë në 6 janar, janë ata, që kanë përballuar vetë, të gjitha fushatat, me financat e tyre, me kontributin e tyre, me kohën e tyre, janë ata, që më parë i mbyste Rama me gaz dhe tani i mbyt ti!”, deklaroi ish-kreu i degës së PD së Fierit, Luan Baçi.
Nga brenda sallës, pasuesi i tij, Agron Kapllanaj tha se kundërshtarët e Bashës kishin dalë në protestë kundër tij të detyruar.
“Sepse mbrëmë në 11 të natës ish-kryetarin e degës (Luan Baçin) e ka marrë në telefon Sali Berisha dhe i ka thënë që do t’i nxjerrësh me zor njerëzit atje kundër Lulzim Bashës. Sali Berisha është një komunist, një ish-sekretar partie”, tha Kapllanaj.
